Lifandi hringform - myndlistarsýning eftir Ísól

Ísól Lilja Róbertsdóttir heldur myndlistarsýningu með nýjum og nýlegum verkum í Norska húsinu í Stykkishólmi. Sýningin opnar 6. apríl.

Ísól ólst upp í Stykkishólmi og var því frá ungum aldri umkringd fallegri náttúru Snæfellsness. Hún hefur alltaf verið heilluð af mynstrum og litum, ekki aðeins í náttúrunni, heldur einnig í geimnum.

Ísól er með B.Sc. gráðu í eðlisfræði með áherslu á stjarnvísindi frá Háskóla Íslands og stefnir á frekara nám í stjarneðlisfræði. Í frístundum málar hún mandölur og í list hennar má sjá innblástur frá náttúrunni og litirnir og spíralarnir minna einnig á vetrarbrautir og stjörnuþokur.

List Ísólar hefur öðlast athygli á samfélagsmiðlum og er Instagram reikningur hennar (@drawing_in_ice) með yfir 20 þúsund fylgjendur.